LEGAZPI CITY – Ibinunyag sa paghampang sa Senate Blue Ribbon Committee kan mag-agom na kontratista na sinda Sarah asin Curlee Discaya an suboot mahiwasang katiwalian sa likod kan mga proyekto kan gobyerno, kun saen idinawit ninda an pirang opisyal kan Department of Public Works and Highways (DPWH) asin mga mambabatas, kabale sinda Rep. Elizaldy Co asin Speaker Martin Romualdez.
Segun kay Sarah Discaya, nagpoon an gabos kan manggana sa mga proyekto an saindang kompanyang St. Gerrard Construction sa paagi kan patas na bidding.
Huli digdi, nagtatag pa sinda nin kadugangang mga kumpanya alagad dae naghaloy suboot an nagpoon na magrani sainda an mga district engineers, regional directors kan DPWH, asin mga chiefs of staff kan mga mambabatas, na nag-ofresir nin proyekto kapalit kan kwarta.
Pigprobaran suboot ninda na isumbong sa DPWH an mga pangyayari, alagad dae man pig-intindi.
Lugod, sinabihan sinda na kun gusto nindang ipadagos an proyekto, kaipuhan nindang tawan nin porsyento an mga mambabatas.
Kun dae, hahaleon sinda sa listahan kan mga kwalipikadong kontratista.
Ipigbuyagyag man ni Curlee Discaya na makalihis na manggana sa bidding, nagdulok saiya an nagkapirang opisyales kan DPWH na naghahagad nin 10% hasta 25% na share sa proyekto, bilang kondisyon nganing dae maatraso an implementasyon.
Pinangaranan kan mag-agom na Discaya an mga minasunod na opisyal asin mambabatas na imbuelto suboot sa anomaliya:
Terrence Calatrava
Roman Romulo
Jojo Ang
Patrick Michael Vargas
Arjo Atayde
Nicanor Briones
Marcelino Teodoro
Florida Robes
Eleandro Jesus Madrona
Benjamin Agarao Jr.
Florencio Gabriel Noel
Leody “Odie” Tarriela
Marvin Rillo
Reynante Arrogancia
Teodoro Haresco
Antonieta Eudela
Dean Asistio
Marivic Co Pilar
Segun ki Curlee, personal na nakipag-olay sainda an mga representante kan mga mambabatas ngani na kolektahon an suboot kickback.
Binanggit man niya na kalimitang pigsasabi kan mga DPWH personnel na an kwarta an para kay Zaldy Co, asin dapat an dae mababa sa 25%.
Nagpahayag an Discaya couple nin kahandaang magsirbing state witnesses nganing ilantad an suboot sabwatan sa pagultangan kan mga mambabatas, ahensya kan gobyerno, asin mga personahes kaini.
Nangapudan man sinda nin proteksyon ki Sen. Rodante Marcoleta asin Presidente Ferdinand Marcos Jr., huli sa huma sa saindang kaligtasan.
Pagdoon pa ni Curlee na wara sindang ghost projects asin gabos kan saindang kontrata an may aktwal na implementasyon.
Sa presente, nagpaluwas na nin opisyal na pahayag hale sa lado ninda Romualdez asin Co, pati na kan iba pang imbwelto sa alegasyon.
 officials and lawmakers, including Rep. Elizaldy Co and Speaker Martin Romualdez.){kind=link}