LEGAZPI CITY – Nagsagibo nin mahiwasang youth coalition an progresibong grupo na Akbayan Youth kabale an mga manlain-laing hanay kan mga jovenes mapadapit sa corruption sa mga flood control projects kan gobierno.
Segun ki Akbayan Youth secretary-general Khylla Meneses sa intrevista kan Bombo Radyo Legazpi na piglansar ninda an Youth Against Kurakot (YaK!) huli ta mawot nindang magin kadiri an korapsyon asin masyerto na dae ninda pig-nonormalize an korapsyon.
Dapat man suboot an dae piggagamit an pondo kan namamanwaan para sa marangyang buhay kan public officials, politiko asin contractors kun kaya nagsasagibo sinda nin mga hiro protesta nganing mapanimbag an dapat mapanimbag.
Punto niya man pigmumulto an pondo kan taumbayan kun kaya nagsagibo man sinda nin “Ghost Hunting” kun sain babantayan ninda an mga proyekto asin aaramon kun substandard an materyales na ginamit, tinipid sa pondo o kun talagang ghost project an nangyari sa mga ipigtugdok na flood control.
Nagtutubod man si Meneses na sa mga masunod na aldaw an kadakol pa an dapat na mapanimbag maski yaraon pa ini sa Senado, House of Representatives o maski sain pang ahensya kan gobierno huli ta bako bastante an pagsasagibo sana nin imbestigasyon.
Dapat sana suboot na iluwas an dagit huli ta pighabon an labi bilyon na kantidad na pwedesir kuta ibugtak sa edukasyon alagad isasagibo ninda an mga hiro protesta sa mahinahon na paagi huli ta dae man ninda masusulusyunan an kariribukan ki panibagong kariribukan.
Mawot niya man na makonsensya an Pamilya Discaya huli ta an dagit kan namamanwaan an kulang pa sa kwartang ipighabon ninda sa pondo kan banwaan mantang makasupog suboot para sa abogado kan mga Discaya na masunad nin kaso sa mga pilipinong mawot man sanang ibalik an pondong pighabon.
Pagdoon man si Meneses na mabantay sinda asin sinda an henerasyon na nandidiri sa korapsyon kun kaya papatunayan ninda ini sa mga aktibidad na ikokondusir ninda nganing maisalbar an saindang futuro sa mga pondong pighahabon.
