Preparado an defense team ni dating Presidente Rodrigo Duterte na ipresenta an counter evidence pag naghampang na an dating Presidente sa International Criminal Court (ICC) sa Setyembre 23.
Sa sarong redacted document na may petsang Setyembre 2, ipinaaram kan lead defense lawyer ni dating Presidente Rodrigo Duterte na si Nicholas Kaufman sa Pre-Trial Chamber 1 an mga pidaso kan ebidensiya na saiyang isusumiter para sa confirmation of charges na masuporta sa mga argumento kontra sa mga dokumentong may laog kan mga kaso sa dating Presidente.
An notification kan defense team an alinsunod sa Rules of Procedures and Evidence kan ICC na nagsusugo sa defense na magtao nin listahan kan mga ebidensya sa korte nin dae malagpas sa 15 aldaw bago an nakatalaang hearing.
Sa Setyembre 23 nakatalaang magpuon an apat na aldaw na confirmation of charges hearing para sa pig-aakusar na crimes against humanity laban sa dating Presidente kan Pilipinas.
Digdi bibistohon kan korte kun igwa o warang bastante na ebidensiya para sa kaso laban ki Duterte, na magigin basehan kun ipagpapadagos an trial.
