LEGAZPI CITY – Pighihiling kan sarong election watchdog group na masyadong late na an pigsasagibong imbestigasyon kan Commission on Elections mapadapit sa mga senador na nagtanggap nin donasyon hale sa mga contractor kan 2022 Presidential Elections.
Segun ki Kontra Daya Convenor Prof. Danilo Arao sa intrevista kan Bombo Radyo Legazpi na dapat kan nagsumite pa sana an mga kandidato kan saindang Statements of Contributions and Expenditures (SOCE) an dapat hiniling na kan komisyon kun siisay an mga nag-contribute.
Piggibo na dapat an suboot dati nganing malikayan an pagkakaigwa nin conflict of interest huli ta tatanawon kan mga naelihir bilang utang na loob an itinabang kan mga kontratista nganing magin pabor sa sainda an ipapa-otob na ley o polisiya.
Magkakaigwa pa man liwat nin epekto an resulta kan isasagibong imbestigasyon kan komisyon maski kan 2022 pa ini nangyari alagad magigin hapot digdi iyo an kun nasa sainda pa an gagamiton na budget para sa pag-iimbestiga.
Punto pa kaini na maserbi ining wake up call na dapat pigbubusisi kan Comelec an mga pigsusumiteng SOCE kan mga nanggana asin nadaog na kandidato sa pirilian nganing warang makalusot sa mga siring kaining isyu mantang dapat masulusyunan an money politics na permihang nangyayari sa panahon nin pirilian.
Suhestyon niya man na magin transparent sa publiko an kantidad kan donation and expenses sa paagi kan pag-upload sa website kan Comelec nganing nahihiling kan publiko an kantidad kan donasyon asin nagagastos kan gabos na kandidato asin partido.
Bilang sarong kandidato sa National or Local position an dapat pig-iimbestigaran mo kun siisay an mga nagsusuporta saimo nganing dae magkaigwa nin problema sa saimong pigbubusol na ley huli ta bako palusot an masabi ka na dae mo bisto na kontratista palan an nagdonar para sa kampanya mo.
Pagladawan pa ni Arao na nyata ka matanggap nin mga donasyon hale sa sarong construction company kun an saro sa mga pigbubusol mo sa kampanya an mapadapit sa katiwalian sa flood control project.
