Pinaghahandaan na kan Commission on Elections (COMELEC) an posibleng legal na angat sa pag-octaba kan Barangay asin Sangguniang Kabataan Elections (BSKE) na nakatalaan kuta sa Nobyembre 2, 2026.
Segun ki COMELEC Chairman George Garcia, bako otomatikong ibabalik an filing kan Certificate of Candidacy (COC) enkasong igwang magsaunad nin petisyon sa Korte Suprema kontra sa bagong ley.
Mas pinagkakahaditan kan poll body an posibilidad na magpaluwas an Korte Suprema nin temporary restraining order na posibleng maka apektar sa saindang preparasyon.
Pigduon ni Garcia na dae pwedesir na basta-basta ibalik an mga nakanselar na aktibidad na warang malinaw na polisiya asin bastanteng abiso sa mga botante asin mga mawot kumandidato.
Katakod kaini, liwat na bubuksan kan poll body an voter registration sa ika-duwang semana kan Nobyembre hasta sa Hulyo 2027 ngani na makapagrehistro an mga bagong botante asin makapaglipat nin registration an iba.
Napag-araman na uminabot na man sa P8 billion an nagastos kan poll body sa preparasyon para sa na-octaba na pirilian.
Sinierto man ni Garcia na isasaray muna an mga election paraphernalia, kaibanan an mga balota, ngani na mapakinabangan pa sa mga masunod na pirilian.
Marurumduman na pinirmahan ni Presidente Ferdinand Marcos Jr. an ley na naglilipat kan BSKE sa Nobyembre 2028.
