LEGAZPI CITY – Denepensaran ni Ako Bicol Partylist representative Alfredo Garbin Jr. si Representative Zaldy Co sa pagkaka-dawit kaini sa kompanyang Sunwest sa imbestigasyon sa flood control project na isinagibo ni Presidente Ferdinand Marcos Jr.
Magigirumduman kaya na ikawalo sa listahan kan 15 contractors na may pinakadakol na flood control projects na ibinulgar kan Presidente an Sunwest, Inc.
Segun saiya sa eksklusibong intrevista kan Bombo Radyo Legazpi asin para man sa patas na pamamahayag, sinabi niya na gabos na papel poon kan 2019 an dae na mahihiling an pangaran na Zaldy Co sa sunwest huli ta nag-divest na ini nganing dae na magkaigwa nin conflict of interest.
Alagad punto niya man na maski yaon pa si Co sa nasabing kompanya an wara man nin iniluwas na iregularidad an pagigin kasabay sa listahan na iniluwas kan presidente.
Paliwanag niya na sa laog kan 30 taon an wara siyang nahiling na iregularidad o reklamo an Commission on Audit asin Department of Public Works and Highways sa mga proyekto na kinaputan kan Sunwest.
Pigtaram pa kan opisyal na dae muna pag-akusaran an sarong kompanya hangga’t dae pa ini napapatunayan asin kun talagang napatunayan na may sala an dapat hampangon ini.
Kinondena niya man an mga suboot fake news na nagluluwasan sa social media mapadapit sa ibang mga proyekto kan Sunwest asin pigklaro na haloy nang tapos an sarong tinampo na nagkokonekta sa Barangay Taysan, Legazpi City asin Sorsogon na naglakop na dae pa tinapos kan nasabing kompanya.
Pagdoon man ni Representative Garbin na dae dapay pigbabasol sa palpak na mga infrastructure project an mga kongresista kundi dapat na basulon iyo an DPWH asin COA huli ta sinda an dapat nagsye-syerto na areglado an gabos na mga proyekto.
