LEGAZPI CITY – Nakatalaan nang punan an rehabilitasyon sa mga kakalsadahan na sakop kan Barangay Gogon, Legazpi City makalihis na aprubahan ini kan Sangguniang Panglungsod.
Segun ki Kagawad Richilda “Chie” Atun sa intrevista kan Bombo Radyo Legazpi na basado sa saindang pag-oorolay kan mga engineering personel, pupunan an rehabilitasyon sa maabot na lunes, August 18 asin naghahagad ini nin kooperasyon sa saindang mga nasasakupan.
Maugma sinda huli ta natawan na man nin aksyon an haloy nang agrangay kan saindang mga residentes maski inabot pa ini kan nagpalit nin administrasyon kan City Government.
Paghistorya niya pa na haros limang taon nang pigsasapar kan mga residente partikular na an mga nasa purok kwatro an raraot na tinampo sa saindang barangay.
Pigtaram pa kan opisyal na aabuton nin labi sarong bulan an magigin durasyon kan pagsasa-ayos kan tinampo mantang sasaguton kan gobierno lokal an kabilugang gastos sa nasabing rehabilitasyon.
Sa tabang suboot kan bagong tinampo an dae na kakaipuhanon maglakaw nin harayo kan mga residente enkaso may mga bitbit an mga ini nin kadakol o magagabat na mga gamit.
Pangapodan ni Atun sa mga residentes na makipag-kooperar huli ta parte kan rehabilitasyon an pagsarado kan mga raot na tinampo asin dae pagpapa-agi sa mga behikulo.
