LEGAZPI CITY – Nagsunad na man an grupo nin mga driver sa korte suprema na may kinaaraman sa pag-archive kan Senado sa impeachment complaint ni Vice President Sara Duterte.
Segun ki Pagkakaisa ng mga Samahan ng Tsuper at Operator Nationwide (PISTON) President Mody Floranda sa intrevista kan Bombo Radyo Legazpi na nakisumaro sinda sa pagsusunad kan Makabayan Bloc nganing hilingon liwat kan korte an saindang desisyon na pigdeklara nindang unconstitutional an impeachment complaint laban sa bise.
Kun siya kaya an hahaputon, masasabi niyang makatarungan asin may hirarom na basehan an isinunad manungod sa impeachment kun kaya nagsunad sinda sa pangengenot kan Makabayan Commission asin saindang abogado.
Naglalaom siya na dadangugon sinda kan Korte asin pag-aadalan an saindang naenot na desisyon huli ta maski dae ninda ibinasura an kaso laban sa nasabing opisyal an kundi igwa sana ining probisyon na mawot man nindang linawon.
Pigtaram pa kaini na bako sana dapat si VP Sara an maghampang kundi an gabos na mga opisyales kan gobierno na imbwelto sa graft and corruption huli ta an mga kwartang hinabon an hale sa buwis kan taumbayan na dapat pigbabalik ninda sa paagi kan programa.
Kun wara suboot na kasalan an Bise an dapat dae ini magduwa-duwang maghampang sa mga pagdangog asin hampangon an impeachment na isinunad laban saiya kan mga taumbayan.
Pagdoon niya man na dakulang taba kuta sa saindang sektor kun nagamit sa rehabilitasyon kan pampublikong transportasyon an labi P600M na kantidad kan kwartang suboot ginastos kan Bise sa laog nin haros duwang semana.
Sa ibong kan naenot na deklarasyon kan Korte Suprema sa impeachment complaint ni Vice President Sara an kompyansa pa man si Floranda sa paghiro kan namamanwaan huli ta dapat gabos na elehidong opisyal an umagi sa proseso kun may hinabon ining kaban kan banwaan.
