LEGAZPI CITY – Nagbarewas na nin tabang an provincial government of Albay sa mga banwaan na labing naapektaran kan mahiwasang pagbabaha makalihis an magdamlagang pag-uuran na dara man kan mga magkakasunod na bagyo asin habagat.
Segun ki Albay Governor Noel Rosal na pinadara na sa mga apektadong munisipyo an saindang naka-prepositioned na pondo nganing sinda na an magbarewas kan mga ini sa saindang nasasakupan.
Nagtao man sinda nin tabang sa mga nagharagad na kadugangang ekipahe arug kan responders, trucks asin iba pang kagamitan para sa clearing operation asin pagreresponde sa mga binahang lugar.
Pagdoon niya man na dapat nang matapos an pagpapatugdok kan Pioduran District Hospital huli ta piglalaog na nin tubig an edipisyo duman na nagpapadifisil man sa mga pasyente.
Pigtaram pa kan opisyal na maski epekto pa sana ini kan mga bagyo an dapat magserbi na ining “wake up call” sa mga gobierno lokal na iprayoridad an saindang preparasyon sa mga bagyong pedesir pang mabilog asin direktang tumama sa provincia.
Nakatalaan niya mang papunan tulos an pagbubugtak nin riprap sa pinangyarihan kan landslide sa may tinampo kan Barangay Pintor sa banwaan kan Polangui nganing dae na maapektaran pa an mga kataraid na lugar urog nang saro an nasabing tinampo sa pig-aagihan pasiring man sa banwaan kan Tiwi.
Paglilinaw niya na may piggagamit na pondo an mga gobierno lokal asin gagamiton sana an pondo kan gobierno provincial enkasong naapektarang maray an Albay huli ta kadalan sa mga ini an mga isolated cases man sana.
Plano man ni Governor Rosal na magpaluwas nin memorandum na kun sain maski warang tropical cyclone wind signal an Albay alagad kun igwang red, orange, asin yellow rainfall warning an nasa Provincial Disaster Risk Reduction and Management Council an desisyon kun magkakaigwa nin suspensyon kan mga klase.
