LEGAZPI CITY – Nagtaong pagirumdom an Land Transportation Franchising and Regulatory Board Bicol sa mga transport service entity na magtao nin discount sa mga estudyante, person with disability, senior citizen asin iba pang sakop kan ley.
Segun ki LTFRB Bicol Director Joel Defeo sa intrevista kan Bombo Radyo Legazpi na dae man paglingawan kan mga pasahero asin driver an pagtatao sa mga senior citizen nin priority seats.
Pigpapa-ibitar man ninda an mga driver sa pagsingil nin overcharged na pamasahe maski last trip na suboot an byahe asin i-otob an proper discount sa kada byahe.
Syertuhon man suboot an kamugtakan kan mga behikulo siring man kan mga driver asin an labing pag-iingat nganing dae man madara nin kapahamakan an mga estudyante mantang nagsagibo na man sinda nin random drug test sa mga driver kan mga public utility vehicle asin sa kagayunan an wara man na nagpositive.
Pagdoon kan opisyal na nag-issue na man sinda nin provissional authority para sa pagdudugang nin legal na operasyon asin pagbyahe sa nagkapirang lugar sa rehiyon.
Enkasong may madakop o mapatunayan na driver na dae nagtatao nin discount sa mga estudyante, pwedesir suboot ining mahampang sa penalidad na posibleng mauli sa pagkakanselar kan prangkisa kan mga ini.
Nakamonitor na man an saindang mga personnel mapadapit sa mga behikulo na mga kolurom nganing maasigurar an kaligtasan kan pasahero asin mga estudyante.
Mahigot na patanid ni Defeo sa mga public utility driver na ibitaran an overloading asin pagpapasakay sa mga topload asin pagsabit nganing dae maghampang sa magabat na penalidad asin pasensyahan na sana suboot enkaso madakop sinda kan saindang mga personnel.
