LEGAZPI CITY – Pighayag kan Teachers Dignity Coalition na excited maglaog sa klase an mga paratukdo ngonian na aldaw katakod na man kan pagpopoon kan school year 2025-2026.
Alagad segun sa Chairman kan grupo na si Benjo Basas sa intrevista kan Bombo Radyo Legazpi may mga nag-abot man saindang report mapadapit sa mga kakulangan sa mga eskwelahan asin sa resulta kan pilot implementation kan bagong senior high school program.
Gabos na mga concern an naipadara na ninda sa manhamiento kan Department of Education nganing matawan nin aksyon asin kasimbagan.
Mas kadakol suboot an naresibi nindang problema kan nakaaging taon kompara ngonian huli ta nataon na pigrarapado kan kalamidad an nacion kan hulyo 2024 kun sain nadistroso an nagpirang eskwelahan asin learning materials.
Nanindugan man an opisyal na gabos na kakulangan kan gobierno sa sektor kan edukasyon an piggigibuhan nin paagi kan mga paratukdo alagad naaabuso ini nganing pabayaan an mga eskwelahan asin estudyante.
May nakaabot na man saindang impormasyon mapadapit sa pagklase sa covered court asin sa irarom kan mga kahoy kun kaya pig-enganyar ninda an mga paratukdo na dae magtugot na magigin arug kaini an sitwasyon kan mga estudyante.
May mga eskwelahan man suboot an nagsasagibo na nin shifting asin may mga classroom man na pigbabanga sa duwa nganing magamit sana sana kan duwang section.
Pagdoon ni Basas na padagos an saindang pakikipag-koordinar sa Deped nganing madangog ninda an mga agrangay kan mga nasa sektor kan edukasyon asin nganing magibuhan ini nin sulusyon.
