LEGAZPI CITY – Gadan an sarong lalaki makalihis maaksidente an pigmamanehong motorsiklo sa Barangay Bogtong, Legazpi City.
Segun ki Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi na 37 anyos an nasabing lalaki, may agom asin sarong chief cook kan sarong restaurant.
Pigbabaybay suboot kan biktima an tinampo sa kahalabaan kan nasabing barangay kan biglang nagsemplang asin nakatama sa sarong gutter.
Huli sa kusog kan impact an tinalyap an biktima nin haros 50 meters mantang pigporbaran pa kutang idara sa pinakaharaning hospital alagad idineklara nang dead on arrival.
Pigtaram pa kan opisyal na basado sa saindang inisyal na imbestigasyon an dae man naka-inom an biktima asin posibleng marikas an pagpapadalagan kaini kan mangyari an insidente.
Wara man sindang nahiling na may nakasagi sa motor na pigmamaneho kaini kan oras na magsemplang ini.
May mga nairehistro na man na mga vehicular accident sa lugar kan pinag-semplangan kan biktima.
Pagirumdom ni Paña na ibitaran an pagmamaneho nin nakainom asin syertuhon an kondisyon kan behikulo asin kan driver nganing malikayan an pagkaka-imbwelto sa ano mang klase nin aksidente.
