Sa enot na bes poon kan maglaog sa pulitika sa Albay kan 1998 an dae nanggana si Cong. Joey Salceda.
Kumandidato si Salceda sa pagka-gobernador asin hinampang an pambato kan PDP-Laban na si Noel Rosal.
Basado sa resulta kan pirilian sa nasabing probinsya (May 15), nagkamada si Rosal nin 401,615 votes mantang 391,902 votes sana an nakuwa ni Salceda.
Sa laog kan pirang dekada, nagsirbi si Salceda sa manlain-laing posisyon sa probinsya kan Albay.
Sa anom na gubernatorial elections sa nasabing probinsya, apat na beses siyang duminalagan bilang unopposed.
Sa sarong statement, sinabi ni Salceda na warang mas halangkaw na karangalan kundi an padabaon asin mapagsirbihan niya an probinsya kan Albay.
Magtetenir suboot an saiyang commitment sa naunambitang probinsya.
Sa ibong na lado, sa ibong kan pagpili nin mga botante kan Albay kan sarong PDP-Laban governor, mas pinili kan mga ini sinda Sen. Bam Aquino, Kiko Pangilinan, Erwin Tulfo, Pia Cayetano asin Ping Lacson sa pagka-senador.
Nangenot si Aquino sa pagka-senador sa nasambitang probinsya asin kuminamada nin 422,922 votes mantang pangduwa si Pangilinan na nakakuwa nin 349,796 votes.
Si Sen. Go sana an kandidato kan PDP sa pagka-senador na nakalaog sa Magic-12 sa probinsya nin Albay kun saen kuminamada siya nin 197,832 votes (No.7).
