LEGAZPI CITY—Labi an ikinaogma ni Dave Christian Diaz Bien na gikan sa Tabaco City, Albay na saro siya sa mga nakapasar sa ikinundusir na April 2025 Registered Electrical Engineers Licensure Examination.
Segun ki Engineer Dave Christian Diaz Bien, Rank 7 sa April 2025 Registered Electrical Engineers Licensure Exam, sa intrevista kan Bombo Radyo Legazpi, saiyang ipigpapasalamat na makaiba sa topnotchers sa ibong kan medyo nadificilan siya sa nasambitang eksaminasyon.
Dakula suboot an nagin impluwensiya kan saiyang eskwelahan partikularmente na kan Bicol University sa saiyang pagkakapasar huli ta nagin magayon an kalidad kan edukasyon na nakua niya sa saiyang mga paratukdo.
Dugang ni Bien na sa saiyang pag-review, nagin armas niya an disiplina asin determinasyon ngani na dae siya magsuko sa ibong kan mga pigkakahampang na kadificilan.
Nagpuon an saiyang pangarap na magin sarong electrical engineer kan siya nasa highschool pa, huli kan saiyang interes sa mga bagay na may kinaaraman sa enerhiya asin kuryente.
Afuera digdi, dakula man an nagin impluwensya kan saiyang ama sa pagkua nin engineering huli ta ini-expose siya sa manlaen-laeng klase nin technical works asin saro na digdi an mapadapit sa mga elektrikal na bagay.
Mientrastanto, mensahe man ni Bien sa mga nagmamawot na makapasar sa board exam na importante na magkaigwa nin magayon na pundasyon, disiplina, determinasyon siring man sa pagpangadyi sa Mahal na Diyos.
