LEGAZPI CITY-Pigbabantayan kan Taiwan Coast Guard an mga Chinese fishing boat na padagos na nasasakitan na makalaog sa pigdeklarang restricted waters na sakop kan Dongsha Islands.
An parteng iyan kan kadagatan kontrolado kan Taiwan asin parte man kan South China Sea.
Kan nakaaging aldaw, matrayumpong pinaputok kan Taiwan Coast Guard an duwang Chinese fishing boat na nasasakitan na magsira sa limitadong katubigan gamit an water cannon.
Saro sa mga fishing vessel na ini an tulos na naghale sa lugar makalihis na pauru-utrong patanidan, mantang an ikaduwa nagsayumang magluwas kaya ginamit an mga water cannon digdi.
Segun sa Taiwan Coast Guard, padagos na pigbabantayan an pagprobar na paglaog kan dakul na Chinese fishing vessels sa restricted waters, kun kaya magtetenir na naka-deploy sa lugar an mga barko kaini.
Sa ibong na lado, an Taiwan Ministry of National Defense naireport na igwa nin sagkod sa 23 na eroplanong militar kan Tsina, pitong naval vessels, asin pitong opisyal na barko na nabisto na nag-ooperar sa palibot kan nasambitang estado.
Ini pigmonitor puon pa kan Oktubre 1 hasta Oktubre 2 sa presenteng taon.
