Nakauli na nin Pilipinas si Vice President Sara Z. Duterte makalihis an haros sarong bulang pagtetenir sa The Hague, Netherlands.
Sa impormasyon gikan sa Office of the Vice President (OVP), nag-abot an Bise Presidente sa Ninoy Aquino International Airport (NAIA) kasoodma bandang alas 9:56 nin banggi via Emirates Airlines flight no. EK 334.
Magigiromdomang nagtenir si VP Sara Duterte sa The Hague, Kingdom of the Netherlands, puon kan Marso 12 kasunod kan pagkakaarestar sa saiyang ama na si dating Presidente Rodrigo Duterte na presenteng nasa International Criminal Court (ICC) detention facility huli sa kasong crimes against humanity.
Piglalaomang sa mga masunod na aldaw maluwas nin mga pahayag an Bise Presidente sa nagkapirang importanteng isyung pigkakahampang kaini sa ngonian susog sa Office of the Vice President.
