LEGAZPI CITY—Pigkondena kan Gabriela Bicol an pahayag kan sarong kandidatong nagdadalagan para sa posisyong district representative sa Pasig City makalihis an pagbutas kaining bakong magayon na pahayag sa mga kababaihan partikularmente na sa mga single mom.
Segun ki Gabriela Bicol Spokesperson Jen Nagrampa, sa intrevista kan Bombo Radyo Legazpi, na dae dapat ini ginibo kan kandidato sa saiyang political rally asin dae dapat na paggibohong karaw o magbutas nin misogynistic remarks sa mga kababaihan.
An pahayag kan nasambitang kandidato an nakakabastos sa mga kababaihan orog na kan tinaram ini sa hampang kan publiko.
Tinawan-duon ni Nagrampa na an saindang grupo nagtatao nin importansya asin pigbisto an mga solo parents huli ta aram ninda an mga kadificilan na pigkakahampang kan mga ini.
Dugang pa kaini na pig-aadalan kan saindang grupo, kun pwedesir na sunadan ninda nin kaso an kandidato, mai-diskwalipika sa saiyang kandidatura, o kaya madisbar ini huli ta saro pa ining abogado.
Nangapudan man an opisyal sa mga iba pang politiko na nagdadalagan sa kanya-kanyang posisyon ngonian na eleksyon na dae paggibohon na katatawanan o karaw an sektor kan mga kababaihan orog na kun wara man talaga nin makaulok.
Siring man na dapat magin sensitibo asin hilingon an mga bubutasan na mga pahayag sa kun ini makakakulog, makakainsulto, makakabastos nin ibang indibidwal o kaya kun may mababayolar ini nin ley.
