LEGAZPI CITY—Nangapudan an Schools Division Office Albay na gibohong simple alagad makabuluhan an pagkundusir nin graduation exercises asin moving up ceremony sa mga eskwelahan.
Segun ki Schools Division Office Albay Spokesperson Froilan Tena, sa intrevista kan Bombo Radyo Legazpi, na an nasabing polisiya an gikan sa orden kan Department of Education (DepEd).
Afuera digdi nagpagiromdom man an opisyal sa mga magurang asin paratukdo mapadapit sa “No Collection Policy” kan DepEd kun saen ipigbabawal an pangongolekta nin kwarta sa pagkundusir nin graduation asin moving up ceremony.
Sa presente, wara pa man na nairerehistrong mga reklamo mapadapit sa nasambitang mga pangongolekta.
An DepEd School Year 2024-2025 End-of-School Year rites matapos sa Abril 14-15 kun saen kairiba na digdi an graduation exercises magin an moving up ceremony.
Mantang an last day kan School Year iyo an sa Abril 15.
