Ipinahiwatig ni dating Chief presidential legal counsel Atty. Salvador Panelo na pwedesir magresulta sa kapangganahan ni Vice President Sara Duterte en kaso magadan si dating Presidente Rodrigo Duterte sa detention kan International Criminal Court (ICC) sa The Hague, Netherlands.
Ipighayag ni Panelo na kun babalikan an kasaysayan, na sa kada nagagadan an sarong prominenteng personalidad siring kan Presidente, nagreresulta ini sa pagsakat sa pwesto kan kamag-anak o aki mismo kan namaaram na lider.
Ipighalimbawa ni Panelo kan nagadan si dating Presidente Corazon Aquino, na naelihir kalaunan bilang presidente kan Pilipinas an saiyang aki na namaaram nang si dating Presidente Benigno “PNoy” Aquino III.
Siring man soboot an pwedesir mangyari kun saen uminabot sa mahiwasang protesta an pag-aresto sa dating Presidente.
Sinabi pa ni Panelo na makakaraot sa magigin sunod na pambato kan administrasyon sa masunod na presidential elections en kaso magadan an dating Presidente.
Ipiggiit pa ni Panelo na kun dae magibo nin karamptang aksyon an gobierno sa agrangay kan mga Pilipino, mauutro soboot an kasaysayan kun saen mapapalitan giraray an rehimen asin magkakaigwa nin kariribokan sa politika.
Sinabi man ni Panelo na maski dae magadan sa karsel an dating Presidente, bagay na pigmamawot na dae mangyari, an magigin Presidente man giraray kaini si VP Sara.
Dugang kaini na an tunay na motibo sa pagsunad nin kaso sa dating Presidente sa ICC an para raoton si VP Sara asin an saiyang numero unong supporter asin influencer na si dating Presidente Rodrigo Duterte.
Wara man soboot na tyansa an ibang mga kandidato na manggana en kaso magdalagan si VP Sara sa pagkapresidente sa 2028.
