Albay PTCAO bako pabor pailawan an Bulkang Mayon

LEGAZPI CITY—Bako pabor an Albay Provincial Tourism, Culture and Arts Office (PTCAO) sa soboot pagpapailaw kan Bulkang Mayon sa provincia nin Albay.

Segun ki Albay Provincial Tourism, Culture and Arts Office Head Dorothy Colle, sa intrevista kan Bombo Radyo Legazpi, na bilang miembro kan Albay Biosphere Reserve Network o kun saen na-inscribe an provincia sa biosphere program kan United Nations Educational, Scientific and Cultural Organization (UNESCO), may promesa sinda na dapat magkaigwa nin management plan ngani na masierto an sustainable development kan lugar.

Igwa sindang piggibong mapa kun saen may pig-apod na ‘core zone,’ o dae dapat digdi nin development huli ta dapat ipaotob an mahigot na proteksyon, o an pig-aapod na buffer zone na diit sana an ibubugtak na development ngani maprotehiran an core zone.

Igwa man na pig-aapod na ‘transition zone’ kun saen digdi man dapat nakabugtak an mga development.

Alagad huli ta an bulkang Mayon urog an halangkaw na parte kaini an nakabugtak sa core zone kun kaya dae dapat digdi nin ano man na development.

Sa taong 2026 due for review na an Albay Biosphere Reserve kun saen maaaraman kun karapat-dapat an provincia sa biosphere reserve program kan UNESCO.

Dugang pa digdi, na nagkaigwa man nin inisyatibo an gobierno provincial kan Albay na i-inscribe an bulkang Mayon sa UNESCO World Heritage list na kun saen dapat igwa ining ‘natural beauty.’

Sinabi kan opisyal na an nasambitang duwang rason an kun nata dae dapat madagos an nasambitang pagpapailaw sa bulkang Mayon.

Masurat man sinda sa TIEZA (Tourism Infrastructure and Enterprise Zone Authority) huli ta nakabugtak sa terms of reference kaini na an gobierno provincial kan Albay an saro sa mga technical working group na dapat mag-adal kan naunambitang pagpapailaw.

Sinabi ni Colle na durante kan buminungkaras an proyekto dae pa nakakaresibi an governor’s office nin imbitasyon gikan sa TIEZA ngani na pag-adalan an proyekto.

Mientrastanto, may naresibi man soboot an saindang opisina nin Meeting for Consultation kan Solar Surveying Corporation—sarong private entity na pigsugo kan TIEZA na maggibo kan consultation meeting, alagad sinabi kan opisyal na medyo makaduda an pagpaluwas kan imbitasyon na nagresulta sa manlaen-laen na reaksyon sa lokalidad.

Nangapudan man si Colle sa publiko na suportaran na sana an Albay Biosphere Reserve magin an obheto kaini na makaiba sa UNESCO World Heritage an bulkang Mayon.