LEGAZPI CITY—Pighayag kan Caritas Philippines na panahon na para magkaigwa nin hustisya an gabos na nabiktima kan kaharasan sa extrajudicial killings ni dating Presidente Rodrigo Roa Duterte.
Segun ki Caritas Philippines President Bishop Bagaforo, sa intrevista kan Bombo Radyo Legazpi, na an pangapodan kan mga kadaklan na biktima nin extrajudicial killings bako sana kan nagtukaw bilang Presidente si Duterte kundi sa panahon na alkalde pa ini sa Davao City.
Tinawan-duon kaini na kaya ngonian an panahon na para sa hustisya kan gabos.
Hustisya naman suboot ini para ki Duterte ngani na makapagsabi siya kan saiyang parte sa gabos na akusasyon na ipigtatapok saiya.
Pangapodan man kaini sa gabos na respetuhon an basbas sa dating Presidente huli ta nakalinya ini sa ley kan nacion.
Sa hiling kan opisyal na an pagkakaarestar ki Duterte an sarong pangapodan bilang paninimbagan asin buot-sabihon na warang mas mahalangkaw pa sa ley kan komunidad.
Normal man suboot an pagkabaranga nin mga paninindugan kan kada indibidwal alagad nagmamawot ini na malinawan asin dangugon kun ano an tama.
Siring man na kun anong mga maraot na bagay an nangyari kan mga nakaaging taon an dapat igwang paninimbagan.
Naglalaom man sinda na magkaigwa nin impartial na imbestigasyon asin mangibabaw an hustisya asin katotohanan.
Dapat man na lingawan muna political affliations alagad dapat na isipon an kapakanan kan nacion asin kan namamanwaan.
Mientrastanto, nangapodan man ini na dapat ipangadyi an dating Presidente, mga judges kan ICC, an nacion asin namamanwaan na magkasararo sa paghanap nin hustisya.
