LEGAZPI CITY – Posibleng mag-abot na ngunyan na semana an initial 15, 000 doses kan AstraZeneca vaccines para sa Bicol, susog sa Department of Health (DOH) Regional Office 5.
Sa intrevista kan Bombo Radyo Legazpi ki DOH Bicol COVID-19 coordinator Dr. Rita Mae Ang-Bon, pigkakarkulong nasa 7, 500 na healthcare workers an mabebenipisyaran kan mga nasabing bakuna.
Siring kan enot na naresibeng bakuna na gibo kan Sinovac, maeenot na tawanan kan nasabing bakuna an apat na pilot hospitals sa rehiyon.
Sakop naman kaini an mga healthcare workers na dai nagkwalipika sa bakunang gibo kan China.
Nakapagbakuna naman sa ngunyan nin nasa 1, 280 vaccinees sa Bicol gamit an alokasyon hali sa Sinovac.
Ipapadagos man an vaccination rollout sa Level 2 hospital sa parehong pampubliko asin pribado, sa Legazpi City, Sorsogon asin Catanduanes.
