LEGAZPI CITY – Nakapagtao na nin ikaduwang batch nin module ngunian na aldaw an nagkapirang eskwelahan poon kan buksan ang klase kan Oktubre 5.
Niresibe kan mga eskwelahan an ibinalik na mga sinimbagan na modules poon alas-8:00 nin aga hasta alas-4:00 nin hapon.
Sa intrevista kan Bombo Radyo Legazpi ki Bagumbayan Central School Principal Mary Christine Agarin, kada semana an pagtatao kan bagong module karibay kan sinimbagan na module kan mga estudyante.
Para sa mga magurang na warang oras na magdara kan answer sheets kan aki kun Biyernes, bukas man an drop-off centers maski Sabado asin Domingo.
Inasegurar kan school official na organisado asin naotob an health protocols sa pagrelease asin pagretrieve kan mga nasabing module.
Suspendido man sa ngunian an mga assessment huli ta mas mayor na obheto kan Department of Education (DepEd), an makainukod an mga estudyante dawa sa tahaw kan pandemic.
