LEGAZPI CITY — (Update) Mahagad ngonian nin dugang na enforcement si Viga Mayor Emeterio Tarin makalihis an nangyaring ambush sa mga miembro kan kapulisan sa Brgy. Sagrada, Viga, Catanduanes.
Enot nang nagpahayag nin pagmumundo an alkalde sa pagkagadan kan duwang pulis na sinda PO1 Eva Torcillino asin PO3 Joseph Tupue asin pagka-irido kan apat na iba pa kasabay an mismong hepe kan Viga Municipal Police na si S/Insp. Ernesto Montes Jr., SPO1 Marwin de Vera asin duwang drug surrenderee na lunad kan mobile.
Sa ekslusibong intrevista kan Bombo Radyo sa nasabing alkalde, dae suboot kaini pinensar na mangyayari an insidente sa banwaan urog na haloy nang panahon na warang presensya nin rebeldeng New People’s Army (NPA) sa lugar.
Istorya pa kan alkalde, nasabatan ninda an grupong pigtutubudang nang-ambush sa mga PNP na nakasulot nin military uniform na posibleng bako taga-Viga huli sa Tagalog an taramon kan mga ini.
Nangapodan man an opisyal nin pagkakasinabutan sa lado kan mga rebelde asin sienerto kaini sa publiko na warang dapat na ikahandal huli sa maray man an sitwasyon sa saindang banwaan asin posibleng nagkataon sana an nangyaring pang-aatake.
Nagpaparahay na sa ngonian an mga nalugadan sa insidente mantang nasa nagtetenir sa Viga Hospital an bangkay kan duwang pulis.
Kun babalikan, bandang alas-11:30 kasuodmang udto kan magbyahe an duwang mobile kan Viga Municipal Police pasiring kuta sa sarong event na katakod kan kampanya laban sa droga kun sain lunad kaini an apat na pulis asin poco mas o menos 10 drug surenderees kan masagi kan saro sa mga mobile an nakatanom na improvised explosive device (IED) na rason kan sarong makusog na pagsabog.
Digdi man nalugadan sinda SPO1 de Vera asin duwang sibilyan. Nagadan man sinda PO1 Torcilino asin PO3 Tupue asin irido si S/Insp. Montes Jr. na nagresponde na nagresulta sa ribayan nin putok sa poco mas o menos 20 miembros kan NPA.
