LEGAZPI CITY — Pigpaplanong magsangat nin demanda an reporter sa radyo na si Dennis Bongalbal makalihis ining bungagon sa tulak ni Kagawad Avelino Binalla kan banwaan kan Malilipot.
Segun sa biktima, nangyari an insidente sa laog kan sarong resto bar sa Barangay Bombon, syudad nin Tabaco kun saen pinaapudan suboot siya ni Municipal Councilor Margie Sakai tangarig magkaolay sinda dapit sa bareta na inere sa radyo.
An bareta an dapit man suboot sa jueteng na may naimbweltong opisyal sa nasabing banwaan.
Nagpasiring suboot siya sa lugar asin nakigkig na sana kan yaon man an presensya ni Malilipot Vice Mayor Nong Ampig asin iba pang mga municipal councilors na sinda Avelino Binalla, Kap Joel Bisoña asin Margie Sakai.
Tulos man suboot na sinabihan si Bongalbal kun ano an maipapaheling na pandok sa sainda kan reporter makalihis kaining mgpaluwas nin negatibong bareta asin naimbwelto pa an mga opisyales sa nasabing banwaan.
Alagad mantang nakatukaw an biktima, dae niya suboot nareparo na nag-agi si Binalla sa saiyang likod asin digdi na siya binungag sa tulak.
Tulos man na ipinaabot kan biktima an insidente sa kapulisan.
Mientrastanto, nagpaabot man nin abiso an nagkapirang katrabaho sa media na kaipuhan ipaabot an nasabing insidente sa Presidential Commission on Media Security huli sa kaipuhan suboot na panindugan an integridad kan mga miyembro kan media.
