LEGAZPI CITY—Pasaro-saro nang nagbabalik sa pagpapasada an mga driver kan mga jeep na may rutang Legazpi-Daraga makalihis an nanutarang pagbaba sa presyo kan mga produktong petrolyo.
Segun ki Legazpi-Daraga Jeepney Operators Drivers Association President Edison Briones, sa intrevista kan Bombo Radyo Legazpi, na nasa 90%-95% na jeep an nagsibalikan na sa biyahe sa ciudad.
Alagad segun saiya na sa ibong kaini an apektado man giraray sinda huli sa taas-baba sa presyo urog na sa krudo, kaya mawot ninda na maibalik na man sa normal an presyo kaini.
Dugang ni Briones na hasta sa presente dae pa naididistribuir an ikaduwang batch kan asistensya para sa mga driver gikan sa Department of Social Welfare and Development, asin diit pa sana an natatawan maski sa enot na batch kan nasabing asistensya kun sain nasa kabilogang 40% pa sanang mga driver an nakakaresibe kaini.
Pangapudan kan opisyal sa gobierno mabalik na sa dati an presyo kan krudo asin maasikaso na an pagbarewas nin asistensya urog na an mga tsuper na dae pa nakakaresibe nin mga ayuda.
