LEGAZPI CITY-Nagpatanid an mga awtoridad na posibleng maapektaran an haros 8.4 milyong katawo sa nagkapirang rehiyon sa nacion huli sa makusog na bagyong Uwan na may potensiyal na magin bilang “Super Typhoon”.
Ipighayag ini kan Department of Social Welfare and Development (DSWD) basado sa predictive analytics.
Kairiba sa mga rehiyong posibleng maapektaran an mga lugar sa Ilocos Region, Cagayan Valley, Central Luzon, Cordillera Administrative Region (CAR), CALABARZON asin sa Bicol region.
Alagad an rainband kaini o an sirkulasyon kan bagyo an posibleng magabot sa Western Visayas, Negros Island, Central Visayas asin Eastern Visayas na naenot nang nirapado kan bagyong Tino.
Pwedisir man maapektaran kan bagyong Uwan an 5.7 milyong residente sa mga komunidad na harani sa mga baybayon asin 466,000 na mga tios na pamilya partikular na sa CAR, Ilocos Region asin Cagayan Valley.
Mientrastanto, nagpatanid man an Office of the Civil Defense (OCD) na pwedisir magkaigwa nin makukusog na paguuran asin magwalat nin danyos sa sakop kan radius na 700 kilometers sa kadakol na lugar. Alagad an diameter kaini na nasa 1,400 kilometers an makakaapektar sa mga lugar hale sa Batanes pababa sa Bohol.
Basado man sa datos kan Mines and Geosciences Bureau kan DENR, na posibleng maaapektaran an nasa labi 8,000 na mga barangay asin posibleng makadanas nin mga pagrasay nin daga huli sa dara kaining uran.
Kasunod kaini, nagpatanid an ahensiya sa mas kadakol na bulnerableng lugar huli sa paglumoy kan daga dara kan mga pag-uran kan nakalihis na bagyong Tino partikular na sa Southern Leyte, Quezon, Sorsogon, Cebu, Capiz, Palawan asin Surigao.
Pighikayat man kan ahensiya an mga lokal na gobierno na magpaotob na nin pre-emptive asin forced evacuations hasta saaga, araw nin Domingo orog na sa mga nasa delikadong lugar.
