LEGAZPI CITY-Nadukayang wara na nin buhay an anom na backcountry skiers mantang padagos an paghahanap sa sampulong iba pa makalihis an pagguho kan niyebe (avalanche) sa hilagang parte kan California, kasabay kan makusog na winter storm na tuminama sa estado.
Nagresponde an search and rescue teams sa Castle Peak, sa hilagang-kanluran kan Lake Tahoe, makalihis na igwang magaapod sa 911 ngani i-report an nasabing insidente.
Segun kay Ashley Quadros, an tagapagtaram kan Nevada County Sheriff’s Office, nakaresibe nin sarong apod ngani respondihan an natabunan kan mga nyebe.
Tulos man na nagpadara nin mga tawohan an sheriff’s office kan Search & Rescue team, asin mga crew hale sa California Department of Forestry and Fire Protection ngani magsagibo nin mahiwasang paghahanap sa nasabing lugar.
Mientrastanto, padagos na naeeksperyensyahan an snowstorm sa California, na igwang darang peligro kasabay kan thunderstorms, makukusog na mga paros, asin paguuran nin nyebe.
Nagkapirang mga ski sports man sa palibot kan Lake Tahoe an temporamenteng isinarado huli sa posibleng peligro kan avalanche sa backcountry areas kan Central Sierra Nevada sa Califonia.
