LEGAZPI CITY-Gadan an anom na katawo asin 107 an naisalbar makalihis na magtaob an sarong pampasaherong ferry sa Java Sea, Indonesia, segun sa mga otoridad.
Nasa 130 katawo an padagos na nawawara makalihis na mawaran nin kontak an sakayang pandagat na Virgo Transport 8 mantang naglalayag sa tahaw kan maraot na panahon.
Gikan sa Surabaya pasiring sa Banjarmasin sa South Kalimantan an nasabing ferry asin huring nahiling mga alas 2:00 nin aga kan Domingo (6:00 nin hapon kan Sabado GMT), mga 150 kilometros sa timog kan Banjarmasin.
An mga barko asin sarong helikopter ipinadara na sa lugar para sa mga search and rescue operations. Igwang total na 280 personnel an nagpartisipar sa operasyon, mantang an gabos na mga sakayan pandagat sa Java Sea inalerto na na magreport nin anuman na mahiling na mga pasahero.
An sakayan nagbiyahe sa Surabaya kan alas 10:33 nin banggi kan Sabado asin nakaiskedyul na mag-abot sa Banjarmasin alas 2:00 nin hapon kan Domingo, susog sa datos gikan sa duwang maritime monitoring sites.
Alagad naresibe kan mga otoridad an enot na report na magtaob ini mga bandang alas 4:10 nin aga, ngonian na aldaw.
Igwa man nin 213 pasahero asin 30 tripulante an lunad kaini na igwang 119-meters (390-piye) kan ini magtaob.
