LEGAZPI CITY-Natiempohan an limang menor de edad na naggagamit nin improvised Cannons o “Boga” sa Barangay Cabugao, Bato, Catanduanes.
Segun kay Bato Municipal Police Station Public Information Officer Police Staff Sergeant Renen Delos Reyes sa intrevista kan Bombo Radyo Legazpi na nakumpirma ninda ini kun sain naaktuhan an limang menor de edad na naggagamit nin “Boga”.
Huli ini sa saindang pagpatrolya sa lugar kun sain naaktuhan mismo na nagkakawat an mga menor de edad na tulos nindang dinuman susog sa lokasyon kan ribok hale didgi.
Sa nangyaring insidente, wara man nin nairehistrong nairido.
Idinara na an mga menor de edad sa Municipal Social Welfare and Development Office (MSWDO) ngani pagirumduman kun nata pinagbabawal an mga ini.
Liwat na nangapudan an opisyal na mahigot na ipinagbabawal an paggamit kan “Boga” asin an pagkawat kaini orog na para sa mga kaakian.
Padagos man sindang nagsasagibo nin oplan bandilyo asin naglilibot sa mga barangay.
Nangangapudan man an opisyal sa mga barangay officials na tulos na mag-apod sa sainda o sinda mismo an magkumpiskar kan mga “Boga” asin darahon sa pinakaharaning station kan pulisya.
