LEGAZPI CITY — Kumpiyansa an National Food Authority (NFA) Bicol na maaabot kan rehiyon an target na porsyento kan partisipasyon kan government rice sa merkado sa tahaw kan pagsaka kan September inflation rate sa 10.1%.
Sa intrevista kan Bombo Radyo Legazpi ki NFA Bicol Director Henry Tristeza, ipigpresentar sa nakaaging Food Security Summit sa Philippine International Convention Center (PICC) an improvement sa food requirement sa kada banwaan asin ciudad kasabay kan mga proposal.
Naglalaom si Tristeza na madali nang maabot kan Bicol an 40% na target kan market participation kan NFA rice na sa presente an nasa 23% na urog na pighihiling ining makakapagpababa man kan halangkaw na inflation.
Ikinaogma man kan opisyal an mga report sa nagkapirang provincia sa Bicol na nagbaba na nin P100 an sarong sako kan ipigpapabakal na commercial rice sa merkado.
Katakod kaini sinabi ni Tristeza na afuera kan dinobleng alokasyon, pighahalat naman an papaabot na 234, 000 bags pang imported rice kun sain nanotaran na an pagkawara kan labing halawig na pila kan mga consumidores.
Nagkaigwa naman nin pre-bidding kan nakaaging semana sa initial allocation na 250 metric tons o 5 million bags bilang additional import.
