LEGAZPI CITY — Padagos na pigbubulong ngunyan an apat na persona makalihis na malugadan kan maimbwelto sa aksidente sa entrance kan Mayon Vista Subdivision sa Barangay Tuburan sa syudad kan Ligao.
Segun sa impormasyon na naguno kan Bombo Radyo Legazpi, papalaog sa gate kan nasambitan na subdivision hali sa banwaan kan Guinobatan an tricycle na pigmamanehar ni Renato Timog, 34-anyos lunad an madre na nabistong si Sister Astoria Gandanson, 63-anyos kan bigla ining mabangga kan motorsiklo na pigmamanehar ni Mac Jay Topas.
Huli digdi, nagsapar nin mga lugad sa lawas an mga biktima asin an suspek pati an backrider kaini na si Shiela Bello.
Tulos man na naidalagan sa ospital sinda Bello asin Topas makalihis na magsapar nin malalang lugad asin ngunyan an padagos na pig-oobserbaran.
Sa presente nagpapadagos man an ipigkokundusir na imbestigasyon kan Ligao Municipal Police katakod kan nasambitan na aksidente.
