Irido an 23-anyos na paratinda nin gulay maka badilon sa payo kan 31-anyos na lalaki sa Purok 4, Barangay Sta. Ana, Taytay, Rizal kan Byernes na banggi, Enero 16.
Basado sa imbestigasyon, nag-livestream an biktima kan biglang nagdulok hali sa likod an suspek na nakasombrero asin facemask asin binadil ini sa payo sa haraning distansya, rason na matumba sa tinampo an paratinda.
Segun sa mga testigo, nadangog ninda an putok nin badil kaya tulos sindang nagdalagan, mantang an iba pa naghalat man nin behikulo alagad natatakot na magdulok.
Makalihis an pambabadil, normal na naglakaw parayo an suspechado bago nag-iba sa kaibahan na nakalunad sa motorsiklo.
Tinamaan nin bala an biktima na hale sa calibre .45 na tulos na dinara sa sarong ospital sa Pasig City, kun saen yaon na ini ngonian sa ligtas na kamugtakan asin nagpaparahay na.
Sa ginibong hot pursuit operation kan mga pulis kan Sabadong aga, naaktuhan an suspetsado sa Angono, Rizal.
Segun sa pulis, dati nang nakikipag-date an lalaki sa kagsadiri kan tindahan na pigtatrabahuhan kan biktima asin suboot nainggit asin nagselos kan makipagbulag sa saiya an dati kaining nobya.
Makusog na pinahimutikan kan suspetsado an mga alegasyon kontra saiya.
Nakatenir na ngonian sa Taytay Police Station an suspetsado asin hahahampangon an kasong frustrated murder.
