LEGAZPI CITY – Nagsasairarom sa presente sa training an mga election officers asin election assistants kan Commission on Elections (COMELEC) sa Bicol katakod kan pagbubukas kan voter’s registration sa Agosto 1 na madurar hasta sa Setyembre 30, 2019.
Sa ekslusibong intrevista kan Bombo Radyo Legazpi ki Bicol Regional Elections Supervisor Atty. Maria Juana Valeza, nagkaigwa man nin pag-update sa pigagamit na ekipahe kasabay kan pag-update kan record na kaipuhan na maaraman kan mga ini.
Pagirumdom pa ni Valeza na dapat na mag-activate kan rehistrasyon an mga na-deactivate nang botante tangarig na makaboto giraray sa masunod na pirilian.
Kasabay man sa i-oofrecir sa nasabing aldaw an transfer asin pagpapabago kan mga entries urog na sa mga kakakasal pa sana.
Piglalaoman na magkakaigwa nin 5% increase sa mga new registrants ngonian na taon o nasa 200 hasta 300, 000 na botante an aabuton.
Bukas an COMELEC offices sa pag-akomodir kan mga maparehistro puon Lunes hasta Sabado maski sa mga fiesta official mantang nakatalaan man na magbugtak nin mga satellite offices sa mga barangay asin malls para sa convenience kan publiko.
