LEGAZPI CITY – Nagresulta sa pagkakagadan kan tulong katawo an apat na aldaw na magkakasunod na sagupaan kan Philippine Army asin teroristang grupo sa banwaan kan Mobo sa provincia kan Masbate.
Segun ki 9th Infantry Division division public affairs office chief Major Frank Roldan sa intrevista kan Bombo Radyo Legazpi na duwang miyembro kan New People’s Army an napabaretang nagadan sa mga engkwentro asin sarong suldados man an nagadan asin duwa an padagos na nagpaparahay sa hospital.
Nakuwa man sa lugar kan pinangyarihan kan engkwentro an mga badil asin personal na kagamitan kan nagadan na teroristang grupo mantang dae man ninda madertimina an numero kan irido sa saindang kalaban.
Basado man sa saindang impormasyon an nagdurar nin 10 minuto an nagin palitan nin putukan sa pagultangan kan mga ka-suldadohan asin teroristang grupo.
Pigtaram pa kan opisyal na padagos man liwat an saindang hot pursuit operation nganing dagos nang mapugo an mga armadong miembro asin maguno na an insurhensya sa nasabing provincia.
Nakatalaan mang iuli an hawak kan suldadong nagadan sa saiyang residensya sa Negros Occidental pagkatapos kan ikokondusir nindang misa mantang dadarahon an mga narecover na mga gamit sa 2nd Infantry Batallion headquarters para sa imbestigasyon asin tulos na itu-turn over sa Philippine National Police para sa magkakanigong disposisyon.
Pagdoon ni Roldan na nakahanda an mga kapulisan na magsakripisyo nganing magin salbado an publiko asin dagos nang wakasan an insurhensya sa rehiyon kan Bicol.
