LEGAZPI CITY- Maogmang pigbarewas kan PNP Bicol an karangalan kan tulong parasisira na nakaresibe nin honra makalihis na iturn over sa mga otoridad an narekober nindang pigtutubudang submarine drone sa kadagatang sakop kan San Pascual Masbate.
Segun kay PBGEN Andre Dizon, PNP Bicol Regional Director sa intrevista kan Bombo Radyo Legazpi, nagkaigwa nin hearing an senado na pinangenotan ni Sen. Francis Tolentino para imbestigaran an pagkakarekober kan underwater drone na dakulang huma suboot sa maritime security.
Kasabay kan nasabing pag-urulay an personal man na itinao an pagbisto sa tulong bikolanong parasisira na naka diskobre kan drone na sinda Rodnie Valenzuela Y Magno, Jojo Cantela asin Jeric Arojada.
Segun kay Dizon, kaipuhan na maaraman kan publiko an naging katapangan asin katibayan kan mga nasabing bikolanong parasisira na dapat pangarugan man kan iba pang mga parasisira an saindang ginibong kabayanihan.
Mientrastanto, mapapakusog man suboot kaini an pagiging vigilante kan publiko para maasigurar an siguridad kan kadagatan sa rehiyon.
Kun babalikan kan nakalihis na Disyembre 30, 2024 nadiskobre kan mga parasisira an under water drone sa kadagatan sakop kan Brgy. Iniwaran, San Pascual Masbate.
