LEGAZPI CITY- Matrayumpong nabuwag kan mga otoridad an sarong drug den sa sarong barangay sa Legazpi City.
An nasabing operasyon an nagresulta man sa pagkaka arestar kan tulong personalidad na sinda alyas ‘Ed’ na sarong high value individual asin sarong barangay tanod na bisto na tagsadiri kan nasabing drug den.
Nasakote man an subject kan buy-bust na si alyas ‘Utoy’ na sarong street level individual asin alyas ‘John’ na sarong street level individual na sarong tricycle driver.
Naging matrayumpo an operasyon huli sa pinagsarong pwersa kan Philippine Drug Enforcement Agency Albay Provincial Office kaibanan an PDEA Seaport Interdiction Unit- Pasacao, PDEA Regional Office 5 RSET 1, katabang pa an PDEA Regional Office 5 RSET 2, Regional Maritime Unit 5, RSOT Philippine National Police, Albay Provincial Intelligence Unit, Coast Guard Intelligence Unit Albay asin Legazpi City Police Station.
Mientras tanto, nakumpiskar man an nasa poco mas o menos 12 gramo nin pinagtutubudan na shabu na pigkakarkulong nagkakantidad nin P81,600, buy-bust money, asin iba pang drug paraphernalia.
An mga suspek an nakatalaan na sunadan nin kasong pagbayolar sa Republic Act 9165 o Comprehensive Dangerous Drugs Act of 2002.
