LEGAZPI CITY-Naarestar an nasa 29 katawo makalihis na salakayon kan mga otoridad an sarong pinagtutubudang jueteng hub sa sarong barangay sa banwaan kan Daraga, Albay bandang alas-9:24 nin banggi kan Enero 22, 2026.
Susog sa Albay Police Provincial Office, naarestar ini sa isinagibong operasyon kan mga otoridad kun sain naaktuhan an mga suspek na nagtataya asin nakaresibe nin pustahan.
Sa report kan pulisya, an mga naaresto residente kan Daraga Albay mantang an kadaklan digdi an taga-Quezon.
Bigo man an mga naaresto na magpahiling nin mga dokumento para sa ligal na operasyon.
Nakumpiskar sa lugar an manlain-lain na ebidensya, kaiba an mga booklet asin kopya kan half-size newsprint na may printing Code 128, Collection Report Forms na may nakasurat na mga kumbinasyon kan numero asin kaukulang pagtataya, sarong (1) karton kan mga booklet mga electronic calculator, nagkapirang yellow columnar pad papers na may mga nakasurat na numero, sarong (1) set kan electric tambiolo na may mga numeradong bola, kwartang nagaabot sa P240,000, asin iba pang kagamitan para sa mga ilegal na pagsusugal.
Nahahampang an mga naaresto sa kasong pagbayolar sa Presidential Decree No. 1602, o an ley laban sa ilegal na pagsusugal susog kan Republic Act No. 9287 o Illegal Numbers Game Law.
Presente man na nasa kustodiya kan Daraga PNP an mga suspek para sa karampatang dokumentasyon asin imbestigasyon.
Naarestar ini sa pinagsarong puwersa kan Daraga Municipal Police Station, Provincial Intelligence Unit ng Albay PPO, 2nd Albay Provincial Mobile Force Company, Regional Mobile Force Company 5, Criminal Investigation and Detection Group (CIDG) Albay Provincial Field Unit, asin Regional Intelligence Division 5.
