Gadan an 16 na katawo sa panibagong airstrike kan Israel sa sarong eskwelahan sa Gaza.
Segun sa Palestinian Health Ministry, tinamaan nin bomba hali sa fighter jets kan Israel an sarong eskwelahan sa Al-Nuseirat na nagseserbing refugee camp kan mga sibilyan.
Sa kusog kan pagsabog tulos na binawian nin buhay an 16 sa mga biktima, mantang lugadan an 50 iba pa.
Pigkakahandalan man na madugangan pa an numero kan mga binawian nin buhay huli ta nagkapira sa mga nalugadan an nasa kritikal na kondisyon.
Apwera sa Al-Nuseirat, binomba man kan Israel an sarong harong sa Gaza na nagresulta sa pagkagadan kan 10 katawo.
Hasta sa ngunyan padagos pa an pag-atake kan Israel sa mga Palestinians sa ibong kan ipinaluwas na kasuguan kan World Court na nagsusugo sa pagpundo kan gera.
