LEGAZPI CITY-Tuminama an magnitude 7.8 na linog sa South Cotabato poco mas o menus alas 7:37 nin pagka-aga, aldaw nin Lunes (Hunyo 8, 2026) kun sain 2 katawo na an kumpirmadong gadan.
Segun sa pahayag kan Provincial Disaster Risk Reduction and Management Officer (PDRRMO) na si Rolly Doane Aquino na an mga casualty gikan sa banwaan kan Tupi sa South Cotabato.
An nabanggit na casualty, huli sa nagguho na debris mantang an saro naman, naka-eksperyensya nin cardiac arrest sa matinding takot sa pagyugo.
Nairehistro kan Phivolcs an epicenter kan linog sa Maasim, Sarangani, alagad namatean an Intensity 7 sa bilog na probinsiya kan South Cotabato.
Nagkawsa ini nin mahiwasang pagkahadit asin trauma kun sain kadakol na mga estudyante sa mga pampublikong eskwelahan an nahimatay.
Nagkaigwa man nin darakulang bitak asin dangyos sa mga pader sa mga establisyemyento asin eskwelahan sa lugar, siring man sa mga kalsada sa manlaen-laen na parte sa probinsya.
Huli digdi, tulos na ipigsugo kan Department of Education (DepEd) Region 12 an suspensyon sa enot na aldaw nin klase sa rehiyon ngani masierto na salbado an gabos na mga estudyante.
Nagdeklara na man an South Cotabato Governor nin suspensiyon sa trabaho sa gobierno sa nasabing probinsya.
Sa presente, padagos pa an pigsasagibong damage assessment kan mga otoridad sa gabos na mga nadanyaran na lugar.
Pigpapagirumduman man an publiko na magtenir na nakaalerto huli sa posibleng mga aftershocks sa rehiyon.
