LEGAZPI CITY-Naimbuelto sa road crash an nasa 263 katawo sa katahawan kan Christmas rush poon Disyembre 21 hasta ngonian na aldaw sa presenteng taon.
Basado sa datos kan Department of Health (DOH), nadugangan ini nin 62 na kaso poon kan Disyembre 21 na mas hababa sa nasabing peryodo nin 7% kumpara sa nairehistro kan nakalihis na taon.
Nasa duwang naka-motorsiklo man an nagadan huli sa insidente.
Sa mga nairehistrong road crash injuries, nasa 31 an naka-inom nin arak, 224 an dai nagagamit nin safety accessories siring kan helmet o seatbelt asin 193 an nairehistong motorcycle road crash.
Kasunod kaini, nag-isyu kan mga pagirumdum an DOH para sa ligtas na biyahe ngonian na holiday season kaiba an pagsusulot nin helmet enkaso nagmomotosiklo asin pag-seatbelt sa mga nagmamaneho asin pasahero kan behikulo.
Nagpatanid man an ahensya na dai magmaneho enkaso pagal o nakainom nin arak ngani maibitaran an banggaan sa kakalsadahan, magsunod sa itinalaang speed limit, road signs, asin siertuhong igwang 7 sagkod 8 oras na katurog bago magbyahe siring man an ibitaran an paggamit nin cellphone mantang nagmamaneho.
