LEGAZPI CITY – Nagtutubod an duwang researchers na graduate kan Bicol University na dakulang maitatabang kan paggamit nin net-zero energy tangarig na pagkaburunyugon sa sarong terminal an kalat-kalat na paradahan kan mga pampasahero asin pribadong behikulo sa banwaan kan Daraga, Albay.
Dakulang pasasalamat ninda Jadz Literal asin Vanessa Ella Bermido na pigreconocer an pag-aadal nindang DAHIKULO: A Sustainable Daraga Multimodal Transport Terminal Integrating Net-Zero Energy bilang Most Outstanding Undergraduate Architectural Thesis Project sa bilog na Pilipinas kan Atlas Career Development Center.
Sa intrevista kan Bombo Radyo Legazpi sa duwa, pighihiling na ugat kan problema sa trapiko sa Daraga an kakulangan nin transport facility asin bilang mga graduates kan Archi course, kaipuhan man nin proyekto na makaka-adapt sa sustainability approach mantang pigpaparahay an kapalibutan.
Segun ki Vanessa, dae pang nakakagibo kaini sa nasyon alagad komon na sa ibang bansa kaya ‘big leap’ kun maipapaotob ini sa banwaan.
Ipigheras man ni Jadz na dakol an struggles na kinahampang mantang pigagibo an pag-aadal siring na sana kan pagkagadan kan ama na haros ikawara na suboot kan research.
Dugang pa ni Vanessa na isinalang man sa ibang kompetisyon an nasabing pag-aadal alagad dae natawanan nin oportunidad na manggana.
Sa ibong kaini, labi man an pasasalamat kan duwa sa mga padagos na nagsusuporta sa pig-aambisyon na matawanan pa nin konsentrasyon an pag-aadal tangarig na dagos nang mapondohan asin ma-implementar sa banwaan.
Pighahalat naman sana kan duwa sa ngonian an pag-contact kan development center para sa pormal na pagtatao kan honra.
