LEGAZPI CITY- Makaka-eksperyensya nin 14-oras na blackout an kadaklan sa mga barangay sa ciudad kan Legazpi sa aga, Oktubre 6, aldaw nin Biernes.
Susog sa ipinaluwas na notice kan ng National Grid Corporation of the Philippines (NGCP) asin Albay Power and Energy Corporation (APEC), apektado kan blackout an gabos na lugar na pigsusuplayan nin kuryente kan Bitano Substation Feeder 1 hasta 4.
Mapuon ini alas-6:00 nin aga hasta alas-8:00 nin banggi kun saen paamientras na mawawaran nin suplay an mga nagkapirang parte kan Bitano, Capantawan, Oro Site, Baybay, Pigcale, Victory Village, Dapdap, Lamba, Puro, Binanuahan, Sabang, Lapu-Lapu, parte kan Cabangan, parte kan Imperial St., Imperial Court Subdivision, Tahao Road, Vel-Amor Subdivision, Guevarra Subdivision, Puting Daga, Brgy. 17 Rizal, Ilawod, Ilawod East, Marquez Street asin parte kan Sto. Niño Village.
Kaibanan pa sa mga nasabing lugar an Gogon, Barriada, Renilisan, Bonot, Rawis, Tamaoyan, Pawa, Dita, San Joaquin, Arimbay, Bagong Abre, Bigaa, Buyoan, Bonga, Peñaranda St. asin Mabinit. Makakamate man kan supply interruption an parte kan Brgy. Lidong sa Sto. Domingo siring man an Matnog asin Bañadero sa banwaan kan Daraga.
Rason kaini an pagribay kan aerial disconnect switch sa 20 mVa power transformer sa Bitano substation.
Inasegurar man kan ahensya an pagbabalik kan suplay kan kuryente sa oras na matapos na an trabaho kaya hagad kaini an pag-intindi kan publiko.

RELATED ARTICLESMORE FROM AUTHOR