LEGAZPI CITY – Naputulan nin kamot an sarong 10 anyos na lalaki makalihis maputukan kan ipinagbabawal na paputok na “labintador” sa syudad kan Legazpi.
Segun ki Legazpi City Police Station spokesperson Police Executive Master Sergeant Carlos Paña sa intrevista kan Bombo Radyo Legazpi na nagakolekta an biktima kan mga napaso o dae man puminutok na labintador.
Pigbalo suboot na sindihan giraray kan biktima an mga napurot na paputok asin dae kaini pighuna na biglang nagputok an mga ini na nagkawsa sa pagkalasog lasog kan saiyang kamot.
Nangyari an insidente sa may southern part kan Barangay kan Legazpi asin pirang aldaw bago magsapit an bagong taon.
Pangadyi ni Paña na wara nang madugangan an mga mabibiktima kan paputok nin huli ta dapat nag-uurugma sana an gabos sa pag selebrar kan bagong taon.
Sa presente, kaiba sa mga pigraot sa Camp Simeon Ola kasuhapon an mga nakumpiska kan saindang hepatura sa mga naggagaramit kaini sa syudad na mga improvised cannon o boga.
Padagos an pagpatrolya kan mga kapulisan nganing masyerto an pagtataong asistensya sa syudad may holiday man o wara.
Pangapodan kaini sa publiko na mag-ingat sa pagpapaputok kasabay an pagirumdom sa mga barangay official na magpatrolya sa saindang mga nasasakupan partikular sa mga liblib na lugar kan syudad.
