Waiver na ipinadara ni FPRRD sa ICC, patunay na may maray pa siyang pag-iisip —De Lima

Nagbwelta si Mamamayang Liberal (ML) Party List Rep. Leila De Lima sa kampo ni dating Presidente Rodrigo Duterte kasunod kan saindang pagsumiter nin waiver manungod sa dai pag-atendir kan dating presidente sa nakatalaan na confirmation of charges hearing sa saiyang crimes against humanity case.

Segun ki De Lima, an waiver asin deklarasyon na saiyang ipinadara an patunay na siya an may toltol na pag-iisip, kontra sa mga claims kan saiyang kampo na naglalala na an saiyang pagka-ulyanin.

Kabaliktaran man suboot ini sa pigpipirit kan defense panel na bako ‘fit’ an dating presidente na maghampang sa hearing.

An pahayag nagkokontra man sa mga sa claims kan lead legal counsel na si Nicholas Kaufman na an dating presidente dai na kayang magtao nin ‘instructions’ para sa saiyang depensa.

Tinaram man ni De Lima an pagpirma kan dating presidente sa surat na patunay suboot na nasasabotan niya an laog asin implikasyon kaini.

Nanindugan si De Lima na nagseserbi sanang propaganda para sa defense panel an ipinasa na surat asin nagpapahiling nin ‘defiant Duterte’, na saro sa pangenot na puntong pig-oorgulyo kan saiyang kampo.

Afuera kaini, inaapelar man kaini an emosyon kan saiyang mga supporters sa paagi kan saiyang pahayag na tanggap na niya na magagadan siya sa laog kan kulungan.

Segun sa mambabatas, saro man ining legal strategy huli ta syertong wara nin karahayan an dadarahon kan paghampang ni Duterte sa mga ICC judge, huli ta bisto an dating presidente na bigla na sanang nadadagit sa manlaen-laen na lugar, na suboot posibleng dae makontrol kan saiyang mga abogado.

Segun ki De Lima, puwedesir konsideraron na ‘preemptive damage control’ an non-appearance ni Duterte sa nakatalaan na hearing sa Pebrero.

Pamilyar suboot an abogado sa mga gibo kan dating presidente sa Kamara asin Senado kan Pilipinas, na nagpapahiling kan saiyang pagka-unpredictability.

Nagtutubod an mambabatas na saro sa mga pangenot na kritiko kan dating presidente na bako si Duterte an nagsurat kan letter huli ta kun ginibo niya ini, pwedesir ipig-oorgulyo kan dating presidente an saiyang drug war nganing isalbar an Pilipinas, asin ipigdoon na wara pang state-sponsored mass executions an nangyari sa nasyon, arog kan pirmi niyang pig-oorgulyo .