Pinahimutikan ni Vice President Sara Duterte an mga alegasyon ni dating Senator Antonio Trillanes IV katakod kan suboot bilyon-bilyon na laog kan saiyang bank accounts.
Segun sa bise presidente na haros sarong dekada nang pig-uutro an alegasyon alagad warang nagbago sa detalye kaini, afuera na sana sa suboot makinaryang nagsusuporta digdi.
Tinuyaw man ni Duterte an administrasyon asin nagkapirang institusyon na suboot pigagamit sa politikal na pahayag kontra saiya.
Ipigduon kan bise presidente na malinig an saiyang record, warang kasong pigkakahampang, asin an saiyang mga ari-arian an ipigdeklarar sa saiyang Statement of Assets, Liabilities and Net Worth (SALN).
Dagdag pa ni Vice President Sara na an tunay na parahabon, dae naglalaag nin kwarta sa bangko kundi sa maleta.
Inagyat man kaini an gobierno na simbagon an isyu sa flood control funds, paglangkaw kan presyo kan babarakalon, pagtios, siring man an paz y orden sa Mindanao asin an kriminalidad.
Sa hudyan, nangapudan pa ini na dae magpaloko sa isyu kan impeachment asin itao an atensyon sa kapakanan kan mga namamanwaan.
