LEGAZPI CITY-Pighayag kan sarong Political Analyst na posibleng inanunsyo nin amay ni Vice President Sara Duterte an saiyang Presidential run ngani makatipon nin pwersa o alyansa.
Segun kay Far Eastern University Political Anasyst and Faculty Prof. Amr Solon Sison, sa intrevista kan Bombo Radyo Legazpi na parte ini kan saiyang plano o branding bilang saro sa mga Duterte.
Dugang pa niya na masasabing dakulang lakdang man ini para sa Bise huli sa saiyang mag kontrobersiya siring kan saiyang mga kaso asin an isyu kan saiyang ama na si dating Presidente Rodrigo Duterte.
Pigpapahiling man suboot kaini an saiyang pagporbar niya na paluwason an iba pang mga grupo siring kan plano ni President Marcos asin iba pa sa masunod na eleksyon.
Sinabi pa ni Sison, na saro ini sa saiyang stratehiya bilang siya an pinakamakusog na kandidato basado sa satisfaction rating survey asin sa ngonian wara pang malinaw na competitor kumparar sa saiya.
Katakod kaini, posibleng kumpiyansa an Bise huli sa saiyang level of high satisfaction rating asin posibleng makahanap siya nin alyansa sa kongreo orog na pabago-bago an presenteng komposisyon kaini.
Dagdag pa kan Political Analyst na posibleng inanunsyo niya nin amay an saiyang kandidatura ngani makabilog nin coalition na pirmihang pigagamit asin kinakaipuhan para sa pagdalagan bilang Presidente.
Basado sa saiyang pagtataya, igwang posibilidad na manggana si Sara kun isasagibo an eleksyon ngonian alagad mas pigtatawan kaini nin oras an iba pang oposisyon laban sa saiya.
