LEGAZPI CITY-Uminabot na sa New York an Venezuelan President Nicolás Maduro makalihis suboot siyang arestaron kan mga militar na Amerikano sa saiyang residenysa Caracas.
Basado sa report sarong puting FBI Boeing 757 an luminapag sa Stewart Air National Guard Base bandang alas-4:30 nin hapon (American time).
Makalihis an pirang minuto, suminakat an mga pulis sa eroplano asin nagkapirang indibidwal an pigtutubudang sinda Maduro asin an saiyang agom na si Cilia Flores, kaiba an mga opisyal, an nanotaran na padiit-diit na nagbababa hale sa nasabing sasakyang panghimpapawid.
Susog sa report, inarestar suboot sinda Maduro asin Flores sa kabisera kan Venezuela kan Biyernes nin pagkabanggi asin tulos na inilipat sa Estados Unidos kasunod kan mga kasong may kinaaraman sa drug trafficking.
Pigtutubudan man na enot na dinara an mag-agom sa Puerto Rico bago tuluyang inilipat pasiring sa New York City.
Nanotaran man si Maduro asin an saiyang agom na naglaog sa sarong eroplano sa Ramey Base, sa laog kan Rafael Hernández International Airport sa Aguadilla.
Kinumpirma man kan alkalde kan Aguadilla na si Julio Roldan sa social media na nagagi suboot sa saindang ciudad an Venezuelan leader.
Wara pang opisyal na pahayag hale sa gobierno kan Venezuela o kan Estados Unidos kasunod kan nasabing insidente.
