Papahewason kan U.S. State Department an saindang screening sa social media accounts kan mga foreign journalist na nag-aapply nin visa ngani na magtrabaho sa Estados Unidos.
An lakdang an parte kan pinahewas na polisiya kan administrasyon ni U.S. President Donald Trump kan magpuon an ika-duwang termino kaini kan Enero 2025.
Kaipuhan man an gibuhon na public kan mga aplikante an saindang social media accounts ngani na masuri kan mga opisyal kan US.
Sasairarom man sa kaparehong screening an mga aplikante para sa nagkapirang work visas kan mga obrero hali sa Canada asin Mexico.
Alagad dae kinumpirmr kan U.S. State Department an laog kan internal memo, sinabi kaini na pigagamit an inapod na “online presence vetting” ngani na masierto na kwalipikado an mga aplikante sa irarom kan ley kan Amerika asin bako huma sa pambansang seguridad, seguridad kan publiko o national interest.
Segun pa sa ahensya na magamit an mga visa officer nin manlain lain na paagi sa pagbusisi kan mga aplikasyon ngani na maibitaran an pandadaya asin maprotehiran an seguridad kan nacion.
Bako pa man malinaw kun nuarin ipapaotob an pinahewas na polisiya.
Marurumduman na kan nakalihis na bulan, naghigot man an Department of Homeland Security (DHS) sa mga polisiya sa pagtetenir kan mga foreign journalist, international students, asin iba pang visa holders sa Estados Unidos.
