LEGAZPI CITY- Pangapodan ngunyan kan mga otoridad sa publiko na ipaaram sa ano man na unit kan PNP o ahensya kan gobyerno kun igwa nin impormasyon dapit sa tawong nasa likod kan pagtapok kan nadukayang kalansay nin pigtutubudang umboy sa Brgy. Amoguis, banwaan kan Polangui.
Enot kaini, nadiskubre kan nagngangaran na Bernavie Milan an nasambitan na alegadong skeletal remains na nakabugtak sa plastic bag sa tanoman nin niyog.
Sa intribista ki PCI Arthur Gomez, tagapagtaram kan Albay PNP, sinabi kaini na nagkukundusir na nin imbestigasyon an Polangui MPS kun sain pigkakaolay na kan mga tauhan kaini an mga karaning barangay dapit sa mga bados na nangaki o nataktakan kan Disyembre 2016.
Sigon ki Gomez, pwedesir na manimbagan sa ley an siisay man na nagibo kan krimen.
Mahahaluyan man suboot an resulta kan eksaminasyon kan Regional Crime Laboratory sa kalansay huli ta dakol na impormasyon an kaipuhan na aramon arog kan gender, edad asin kun pirang aldaw o semana na ining gadan.
Maski binendisyunan antes na darahon sa crime lab, hagad man giraray kan opisyal na makonsensya an nagtapok sa pigtutubudan na umboy ngani na matawanan nin hustisya an pigsapar kaini.
